Ég og Jón :/

afi hans Jóns Þórs vöknuðum með þessa hrikalegu magapest á mánudagsmorgninum.
Í gærkvöldi var Jón búinn að tapa 2.5 kg og ég hef grun um að ég hafi misst að minnsta kosti jafn mikið.

Ég er samt ekki viss um að við slægjum í gegn með þessa "ristilhreinsunarmegrun" okkar.
Hún tekur fullmikið á.

Sonur minn, faðir Jóns Þórs, heldur því fram að við Jón eigum það sameiginlegt að vera ÁTVÖGl og að við höfum étið yfir okkur af sviðum og þess vegna fengið í magann. Við höfum ekki frétt af neinum nefnilega ennþá sem komu svona undan skírnarhelginni.

Ég er hinsvegar að láta mér detta í hug að við Jón höfum sameinast um þennan magavírus þegar við vorum að undirbúa og smakka hákarlinn. Við vorum nefnilega þau einu sem smökkuðum hann og ákváðum svo í framhaldinu að setja hann ekki fram á borð.
Han n var nefnilega skemmdur.

Vonandi rísum við Jón upp úr þessu jafngóð og áður, örlítið grennri :)

Jón Þór Baldursson

Við skemmtilega athöfn í kirkju Óháða safnaðarins var ömmustrákur skírður í dag.
Skírnarvottar og guðforeldrar hans voru Rakel móðursystir og Smári föðurbróðir.
Guðforeldrarnir fluttu bæn í athöfninni og pilturinn fékk nafnið Jón Þór.
Í veislunni var svo boðið upp á svið, rófustöppu, súrmat, harðfisk, bæði hráa og reykta hrefnu með piparrót og soya, flatbrauð með hangikjöti.......og svo voru "einhver" salöt. Svona lýsti faðir Jóns Þórs matseðlinum fyrir gestunum.
Það voru líka tertur og kaffi á eftir og þetta var ferlega skemmtileg veisla :)

Eins og sést þá er hann Jón Þór einstaklega efnilegur, ekki nema mánaðargamall og fylgist vel með hlutunum í kringum sig, enda er hann líkur ömmu sinni!

*sæluandvarp* þau eru svo falleg mæðginin.

Hetjan mín, strípalingurinn :)

Helga vinkona mín sem venjulega gengur undir nafninu strípalingurinn er hetjan mín.
Ég hef séð hana standa af sér og rísa upp frá stærsta áfalli sem nokkur getur orðið fyrir.
Hún er svo skemmtilega eðlileg og svo ofboðslega getumikil kona og hún er sko glæsileg líka.

Mér þykir svo vænt um hláturinn hennar og að hann hafi lifað af raunirnar.

Hún arkar áfram veginn ákveðin í að lifa af krafti í minningu dóttur sinnar.
Þannig tæklar hún sorgina.

Ég dáist að henni og í dag er viðtal við hana í DV sem lýsir henni ofsalega vel.

Ég vona að krafturinn hennar geti orðið öðrum ljós í myrkri.

Urr barasta!

Gamli ofninn var rifinn út og helluborðið líka.

þá kemur í ljós að það er bara ætlast til þess að ein græja sé í sambandi við rafmagn!!!!

Gamla helluborðið var tengt í ofninn og ofninn svo í rafmagn!

Rafvirki óskast í hvellil!

SPAAAAAN!

Við karldurgurinn versluðum spanhelluborð og blástursofn í dag. Frá því ég keypti Dísó hef ég brasað á hálfónýtum búnaði sem fylgdi með, glænýr, en virkaði svo illa að flestir nágrannar mínir fóru með græjurnar og hentu í umboðsaðila Fagor á Íslandi og fengu aðrar græjur. og þetta var fyrir tæpum tíu árum! Ég hef survivað á þessu drasli enda vön eldavélum og ofnum til sjós sem þurfti að handstýra hitanum á, það virkuðu engar stillingar svo ég er öllu illu vön. Nú var nóg komið! Heimilisfræðinörd eins og ég verður að hafa almennilegan búnað svo við redduðum málunum í Húsasmiðjunni. Electrolux blástursofn sem hægt er að hita upp í 275°C og gera allskyns kúnstir með og gífurlega flókið spanhelluborð frá sama aðila sem hægt er að prógramma svo það eldi að manni fjarstöddum. (það á eftir að taka mig tíma að læra á það) Það er ekki hægt að nota neina venjulega potta á svona undravélar svo við versluðum nýja potta og eina litla pönnu með. Nú verður bakað, brasað, soðið, steikt og grillað. Þarf að vísu í Kokku að kaupa almennilega stóra pönnu en slíkar fást víst ekki á hverju horni fyrir svona SPAAAAAn borð :) Kitchenaid hrærivélin mín sem hefur staðið biluð í tæp þrettán ár er komin úr viðgerð. Það var smotterí að henni. BAAAKSTUR í aðsigi! Svo í ofanálag erum við langt komin með að mála herbergi brottflutts doktorsnemans, þá flytur örverpið þar inn, hans fyrrum herbergi verður málað og uppfært í borðstofu. Ég finn lyktina af matarboðum hægri vinstri! Nýjar græjur, ný borðstofa og alles! Get ekki beðið :D :D :D

Bólur

Ég er með tvær risastórar bólur á hökunni! Mér finnst út í hött að ömmur fái unglingahormónabólur! Hvert fer ég eiginlega til að kæra þetta óréttlæti???

Ísmolar og ballroom!!!

Doktorsnemarnir búa í þessari líka ferlega sætu íbúð á Keili.
Þær hafa afnot af 10 stórum þvottavélum og 14 stórum þurrkurum!!!!
Geta opnað þvottahús ef þær verða blankar!!!

Það er klakavél á hæðinni fyrir ofan þær.

Það er GEGGJAÐUR líkamsræktarsalur með ROSALEGA flottum tækjum við endann á ganginum þeirra.

Það er risasalur á þriðju hæðinni sem hægt er að halda heilt ball í.

Örverpið hefur ákveðið að flytja til þeirra við fyrsta tækifæri, íbúðin við hliðna er nefnilega laus.

Mikið er kósý og huggulegt hjá þeim og gott og gaman að vita af þeim þarna.......
þótt ég sakni þeirra.

Til hamingju stelpur með þetta fallega heimili, klakavélina, samkomusalina og ALLAR þvottagræjurnar :D

Sunnudagur til sælu :)

MMMmMmmm yndislegur dagur.

Ligg undir sæng með frosin vínber, góða bók og parmaskinku.

Ætla að halda mig í bælinu fram eftir degi.


Það er nefnilega ömmudekurdagur í dag :)


Sætasta krútt í heimi heimsótti mig í gærkvöldi ásamt foreldrum sínum og hann er farinn að myndast við að hjala.



Horfir á alla af mikilli ákefð og reynir að herma eftir allskyns hljóðum.







Hann er dásamlegur, sjáiði bara!

Miðaldra krísuástand !

Talaði við jafnaldra vinkonu mína í morgun. Hún er klár og ferlega vel gerð manneskja. Við erum sammála um að það að vera á fimmtugsaldri er ekkert grín. Geðið flýgur um í hormónaflippi, sálin hristist og allt veldur manni djúpum analískum pælingum um tilveruna og manns eigin stað í þessari tilveru. Hvers vegna gerði maður þetta, hvers vegna virkaði þetta svona og hinsegin, af hverju verða hlutirnir öðru vísi en maður ætlaði og hvers vegna kemur manni svona margt á óvart? Það líður varla sá dagur að við lendum ekki í einhverju formi af miðaldra krísu. Áhyggjuleysi unglingsáranna er sem sagt liðið hjá. Og ég sem hélt að allt yrði svo skýrt og greinlegt þegar maður yrði fullorðinn. Einfalt, klárt og maður yrði öruggur með sig og með allt á hreinu. Mér líður eins og óöruggum, týndum unglingi með bólur í leit að sjálfri mér og meiningu lífsins. Lækningin felst í því að hitta litlu fjölskylduna, horfa á myndir af þeim og gleðjast yfir því að vera ættmóðir. Og þvílík fjölskylda. Sonur minn og tengdadóttir gætu tekið fólk á námskeið í að vera par, foreldrar, ástfangin og hamingjusöm. Þau sameina alla í kringum sig og litla piltinn sem verður skírður um næstu helgi. Ég er yfir mig glöð að litli ömmustrákurinn minn á fullt af ömmum og öfum úr öllum áttum og að hann fái að njóta þess að allir séu glaðir og hamingjusamir yfir honum. Að faðir hans sé stoltur af uppruna sínum og öllum sínum aðstandendum. Ömmudrengurinn á alla uppskeru heimsins skilið. Bárðdælsk svið mega alveg vera BEST :)

"Óttaðist arabísku mælandi menn"

Í Fréttablaðinu í dag á bls. 10 er stutt klausa um innanlandsflug í Bandaríkjunum. Það þurfti að fresta þessu flugi yfir nótt þar sem kona nokkur var óánægð með sex karlmenn sem töluðu arabísku í flugvélinni. Mennirnir og konan voru yfirheyrð og í ljós kom að þetta voru fransk/bandarískir menn á leið heim úr æfingabúðum bandaríska hersins og voru á leið í Írakstríðið. Það fyrsta sem mér datt í hug var hvort móðursystir mín hefði kannski verið í USA. Við fórum nefnilega saman til Spánar fyrir nokkrum árum og einn morguninn var hún á leið ásamt dætrum sínum út í sundlaugargarð. Skyndilega sviptist upp hurðin að hótelíbúðinni og hún kom æðandi inn með dæturnar í traustu handabandi á eftir sér. Panik svipurinn var ólýsandi. "ÞAÐ VAR ARABI Í LYFTUNNI" "VIÐ VERÐUM AÐ SKIPTA UM HÓTEL" "ÞAÐ ERU HRYÐJUVERKAMENN HÉRNA" Mér tókst fyrir rest að róa hana niður og við héldum áfram dvöl okkar á Arabastaying hótelinu án allra hryðjuverka. Veslings maðurinn, hann má þó þakka fyrir að hún réðist ekki á hann vopnuð borðhníf eins og tengdapabbi Lovísu gerði í bók Auðar Haralds "Hlustið þér á Mozart". Eiginmaður Lovísu hafði gefið henni ferð til Spánar og verið svo vænn að láta foreldra sína fylgja með. Aldraða íslendinga sem aldrei höfðu erlendis komið. Eftir mikið bras og vandræði, vegna sérkennilegs ótta tengdapabbans við ræningja, hryðjuverkamenn og hrapandi flugvélar komast þau til Spánar. Við morgunverðarhlaðborðið rekst tengdamamma á svertingja, þann fyrsta sem þau hjónin berja augum, hljóðar upp fyrir sig "morð, nauðgun, árás" og tengdapabbi kemur henni til varnar vopnaður borðhníf. Auður Haralds er snillingur og "Hlustið þér á Mozart" er ein fyndnasta bók í heimi!